Le Livre en papier • Ubuntu mu Bantu, Abantu mu Buntu de JEAN D'AMOUR DUSENGUMUREMYI

Nasomye aka gatabo ka Padiri Jean d’Amour Dusengumuremyi karanshimisha. Ndavuga nti dore umupadiri wumvise koko Ivanjili ya Yezu Kristu, kuko burya nta kindi idutoza kitari ukuzura ubuntu, nk’uko na We ngo “asendereye ubuntu n’ukuri” (Ivanjili ya Yohani 1,14).
Umuntu wuzuye ubuntu aba ari itafari rizima ryubaka igihugu kizima. Uti gute?
Burya umuntu-giti n’Igihugu cye ni magirirane: umuntu muzima yubaka Igihugu kizima, Igihugu kizima kikubaka abantu bazima. Imyanya igize ubuzima bwa muntu ni ine : umubiri, umutima, ubwenge na roho; imyanya igize ubuzima bw’Igihugu na yo ni ine : ubukungu, ubuyobozi, umuco n’imibanire y’abagituye. Iyo uteganishije umuntu-giti n’Igihugu bitanga iki:
Umuntu: Igihugu:
- Umubiri - Ubukungu
- Umutima - Ubuyobozi
- Ubwenge - Umuco
- Roho - Imibanire
Nk’uko ubibona musomyi, umubiri uteganye n’ubukungu, umutima uteganye n’ubuyobozi, ubwenge buteganye n’umuco, roho iteganye n’imibanire. Bishaka kuvuga ngo : umubiri muzima uzahura ubukungu bw’Igihugu, ubukungu bw’Igihugu bukagirwa buzima no kugambirira mbere na mbere imibiri mizima y’abagituye; umutima muzima wemeza ubuyobozi bw’igihugu, ubuyobozi bw’Igihugu bukagirwa buzima no kwemera abagituye mu nzuri zitoshye bakagira amahoro y’umutima; ubwenge buzima bweza umuco w’Igihugu, umuco w’Igihugu ukagirwa muzima no gutyaza ubwenge bw’abagituye; roho nzima inoza imibanire y’abatuye igihugu, imibanire y’abatuye Igihugu ikagirwa mizima no guca inzigo, amakaraza na za munyangire, abagituye bagahumeka umwuka w’ubumwe.
Nusoma aka gatabo ka Padiri Jean d’Amour ukagashyira mu bikorwa, uzamenya gutungwa n’ibikwiye ugire umubiri muzima, uzuzura ubugwaneza ugire umutima muzima, uzamenya gushishoza ugire ubwenge buzima, uzibuka uwo uri we nyirizina ugire roho nzima.
Maze uhinduke utyo itafari rizima ryubaka Igihugu kizima, Igihugu kirangwa n’ubuzima bw’abagituye hamwe n’ibibakikije, Igihugu kirangwa n’ubumwe bw’abagituye n’urugwiro ku banyamahanga babagana, Igihugu kirangwa no guhamya ukuri muri byose bose babireba, Igihugu kirangwa no kubaha ubutavogerwa bwa buri muntu mu bukomangoma bwe akomora ku kuba umwana w’ikinege w’Uhoraho.